Welkom by Osieteddies!

Van die eerste dag af het ons God se seën en Sy genade hier beleef.

Ons het klein begin, maar tans spog ons met sewe vol klasse.  Vir hierdie wonderlike groei in getalle kan ons ook net die Here loof.

Osieteddies is baie bevoorreg om oor onderwyskorps te beskik wat:

  • 'n groot liefde vir elke kleuter het
  • 'n kenner in hul vakgebied is
  • werkstrots het en pligsgetrou is
  • altyd in die belang van die kleuters optree.

Ons leuse is:  "Dis 'n fees om 'n TEDDIE te wees"  en dit word daagliks hier uitgeleef.  Die kleuters leer deur speel.  In elke les word die kleuter se hele lyfie ingespan. Stil-sit word tot die minimum beperk omdat kleuters leer deur hulle sintuie te gebruik. Daar is nie meer as 24 kleuters in ‘n klas en dit bied hulle genoeg ruimte om lekker te speel.

Kreatiewe denke is vir ons personeel baie belangrik, daarom neem die kleuters gereeld deel aan probleemoplossings. Hulle word veral in bewegingspele, musiekkringe en in kunsaktiwiteite aangemoedig om kreatief te dink. Ons doen dus baie moeite om die kleuter se regterbrein goed te ontwikkel.

Elke klas is ook toegerus met ‘n fantasie-area waar die kleuters nog lekker kan fantaseer en hulle in rolspel kan uitleef.

Groot motoriese ontwikkeling is vir die kleuter van die aller grootste belang. Die dagprogram maak voorsiening dat die kleuters baie geleentheid kry om buite te speel. Ons beskik oor geskikte speelapparaat om groot spiere sterk te maak. Laerskool Pietersburg-Oos se rugbyveld word ook benut vir hardloop- en balspele. Elke kleuter word weekliks blootgestel aan pottebakkery, kindermusiek, Stimulus Maksima rekenaarlesse en Playball.

Daar is baie goeie samewerking met die Laerskool se grondslagfase. Ons kry goeie terugvoering van hulle Departementshoofde en die wisselwerking verseker dat Osieteddies se kleuters gereed is vir die Graad R (en later) Graad 1-jaar. Kleuters betree dus die Laerskool vol selfvertroue en met gevestigde vriendskappe.

Osieteddies se ouers is die belangrikste vennoot in die kleuters se opvoeding. Ons is baie dankbaar vir positiewe ouers wat altyd hulle volle samewerking gee. Sodoende word die kleuters se belewenisse van elke tema verder uitgebou.

By Osieteddies Kleinkindontwikkelingsentrum is die kleuters besig, gelukkig en hulle kry daagliks hope uitdagings om hulle volle potensiaal te bereik.

Dis mos ‘n fees om ‘n TEDDIE te wees!

Skryf in vir 2020

Druk asb uit, vul in en stuur terug.

Inskrywingsvorm 2020